ඒකාන්ත ජයග්‍රහණය !

ලෝක කුසලාන තරඟාවලියට කණ්ඩායම් නම් කර හමාරය. දැන් ඇත්තේ කණ්ඩායම් හොඳින් සූදානම් කිරීමයි. කණ්ඩායමට නම් නොකළේ කවුද ඔවුන්ට එසේ වූයේ ඇයි ආදී වශයෙන් වූ කතා දැන් ප්‍රයෝජනයක් නැත. ප්‍රයෝජනයක් ඇති එකම මාර්ගය නම් මෙම කණ්ඩායම යොදා ගෙන ලෝක කුසලාන තරඟාවලියක් ජය ගැනීමට සැලසුම් සකස් කිරීමයි.

මෙවර ක්‍රීඩා කරන කණ්ඩායමේ ක්‍රීඩකයින් ගෙන් ක්‍රීඩකයින් 8 දෙනෙකුම පසුගිය වතාවේ ලෝක කුසලාන අවසන් තරඟයට ක්‍රීඩා කළ ක්‍රීඩකයින්ය. මෙවැනි තත්වයන් මීට පෙර උදාවූයේ 1999 දී නම් වූ ඕස්ට්‍රේලියානු ක්‍රිකට් කණ්ඩායමේය. එහිදීද ක්‍රීඩකයින් 8 දෙනෙකු ඊට පෙර අවස්ථාවේ අවසන් තරඟයට ක්‍රීඩා කර තිබිණි. චාමර සිල්වා හැරෙන්නට පසුගිය ලෝක කුසලාන අවසන් තරඟය ක්‍රීඩා කළ මෙවර කණ්ඩායමට න වූ අනෙක් සෑම ක්‍රීඩකයෙකුම නිරන්තරයෙන් එක්දින තරඟවලට එක් වී තිබේ. මේ නිසා කණ්ඩායමේ අත්දැකීම් ගැන අමුතුවෙන් කියන්නට අවශ්‍ය නොවේ

දැන් බොහෝ දෙනා අසන ප්‍රශ්නය අපට ජයග්‍රහණය කරන්නට හැකිද යන්නයි. වර්තමානයේ පවතින තත්වය අනුව ශ්‍රී ලංකා කණ්ඩායම ඉදිරි පෙළ තරඟකරුවෙකි. එහෙත් අප අමතක නොකළ යුත්තේ මෙය 1996 වනි තරඟාවලියක් නොවන බවයි. ලෝක කුසලානයේදී තණතිලි සැකසෙන්නේ ජාත්‍යන්තර ක්‍රිකට් කවුන්සලයට අවශ්‍ය පරිදිය. ඒ නිසා අනවශ්‍ය ලෙස දඟ පන්දු යවන්නන් ගැන සිතීමට අවශ්‍ය නැත. එහෙත් ප්‍රශ්නය වන්නේ ඉන්දීය කණ්ඩායම නම් කිරීමේ දී දඟ පන්දු යවන්නන්ට මූලිකත්වය දීමයි. ඉන්දියාව ජාත්‍යන්තර ක්‍රිකට් කවුන්සිලයේ බලය අල්ලා ගෙන සිටින නිසා මෙවර තණතිලි දඟ පන්දු යවන්නන්ට වාසිදායක වන ආකාරයෙන් සකස් වීමට බොහෝ දුරට ඉඩ තිබෙන බවට මෙය හොඳම ඉඟියකි. ඒ අනුව අපේ කණ්ඩායමට අවශ්‍ය තරම් අවස්ථාවන් නිර්මාණය වී තිබේ.

කෙසේ වෙතත් අප හොඳින් විමසා බැලිය යුත්තේ ශ්‍රී ලංකා දඟ පන්දු යවන්නන් කොතරම් හොඳ ස්ථානයක සිටිනවාද යන්නයි. පසුගිය අවුරුදු දෙක දෙස බලන විට සුවිශේෂ යමක් දැක ගත නොහැක. කණ්ඩායමේ ප්‍රහාරක දඟ පන්දු යවන්නා වන අජන්ත මෙන්ඩිස් අවසන් වසර දෙකේ දී තරඟ 23 කදී කඬුළු 23 ක් දවා ගෙන ඇතත් පන්දු ඕවරයකට ලකුණු 5 ඉක්මවා ලබා දී ඇති අතර කඬුල්ලක සාමාන්‍යය 40 ඉක්මවයි. ඒ අනුව ඔහු වර්තමානය වනවිට ප්‍රහාරක තත්වයේ නැත. මුරලිද එසේමය. එහෙත් මුරලිගේ වාසියක් වන්නේ ඔහු පසුගිය වසර දෙක ඇතුළත පාකිස්ථානයට සහ ඕස්ට්‍රේලියාවට එරෙහිව ඉතා හොඳින් පන්දු යවා තිබීමයි. මේ නිසා පළමු වටයේ දී මුරලි අතිශය වැදගත් වෙයි. මාලිංග ඉන්දියාව හැරෙන්නට අනෙකුත් කණ්ඩායම් වලට එරෙහිව හොඳ දස්කම් දක්වා තිබේ. නුවන් කුලසේකර සමස්ථයක් ලෙස සෑම කණ්ඩායමකටම එරෙහිව ඉතා හොඳ දස්කම් දක්වා තිබේ. එහෙත් ඉන්දියාව හමුවේ ඔහුගේ දස්කම් පසුපසිනි. එහෙත් තිසර පෙරේරා හොඳින්ම දස්කම් දක්වා ඇත්තේ ඉන්දියාව හමුවේය.

මේ සියල්ලම බලද්දී ශ්‍රී ලංකා පන්දු යවන්නන් තමන් උපරිමයෙන් කරන්නට නියමිත තරඟ ගැන දැනගෙන කටයුතු කළ යුතුය. සාමාන්‍යයෙන් තමන්ගේ පන්දු යැවීමට බියක් දක්වන කණ්ඩායමක් සමඟ ක්‍රීඩා කරන්නට පිටියට බසිද්දීම බොහෝ පන්දු යවන්නන් තරඟයෙන් භාගයක් දිනා හමාරය. මේ නිසා පළමු වටයේ දී මුරලි සහ නුවන් ගේ දස්කම් ඉතා වදගත් වෙයි. ඒ අනුව ඒ කාණ්ඩයේ පළමු ස්ථානය දිනා ගත හැකි නම් වටියි. එවිට වාසියක් සැලසෙයි. එහෙත් මට සිතෙන්නේ 1996 දී මෙන්ම අවසන් පූර්ව තරඟයේ දී ඉන්දියාව හමුවෙන්නට හැකි නම් වැදගත් බවයි. හේතුව වන්නේ වර්තමාන පන්දු යවන්නන් අතර ඉන්දියාව මට්ටු කරන්නට හැක්කේ තිසරට පමණක් වීමයි. යම් හෙයකින් අදාල දිනයේ දී තිසර ද අසාර්ථක වුවහොත් තරඟය ගිලිහෙන්නට ඇති ඉඩ වැඩිය. මේ නිසා අර්ධ අවසන් පූර්ව වටයේ දී කොදෙව් පිළ හෝ දකුණු අප්‍රිකාව මුණ ගැසෙන්නට අප උත්සාහ කළ යුතුය. දකුණු අප්‍රිකාව මුණ ගැසෙන්නේ නම් අවසන් පූර්ව තරඟ දක්වා යන්නට අපට හැකිය. එසේ නොවුනහොත් තත්ත්වය තරමක් අසීරුය. විශේෂයෙන් එංගලන්තය හෝ ඉන්දියාව වනි කණ්ඩායමක් හමුවුවහොත් ඔවුන් සිටින මානසික මට්ටම අනුව අපට දඩි තරඟයකට මුහුණ දීමට සිදුවනු ඇත.

මේ හේතුව නිසා ශ්‍රී ලංකා පන්දු යවන්නන් ඉතා ඉක්මනින් උපරිමයකට පැමිණීම අවශ්‍යය. විශේෂයෙන් මුරලි සහ මෙන්ඩිස්ය. ලසිත් තමන්ගේ රිද්මය රැක ගත යුතුය. මෙය ඉතාම අසීරු කාර්යයකි. ඔහු පසුගිය කාලයේ පන්දු යැවූ ආකාරය අනුව ඔහුගෙන් කිසියම් හෝ මොහොතක රිද්මය ගිලිහෙන්නට ඉඩ තිබේ. එසේ වුවහොත් අනෙකුත් ක්‍රීඩකයන්ට දැඩි වගකීමක් තිබේ. එහෙත් අපේ ප්‍රාර්ථනය නම් ලසිත් උපරිම රිද්මයේ තවත් මාස දෙකක් සිටිනු දැකීමයි. එවිට අනෙක් කණ්ඩායම් වල පිතිකරුවන් ගේ සිත් තුළ චකිතයක් ඇති කිරීම පහසුය.

බැලූ බැලිමට තත්ත්වය එතරම් යහපත් නැත. අවශ්‍ය වන්නේ තමන්ට උපරිමය දිය හැකි අවස්ථාවේ එය ලබා දීමයි. එහෙත් අනෙක් කණ්ඩායම් කිසිවක් සුළුවෙන් තකන්නට නම් නොහැක.

-කාංචන දසනායක-

උපුටා ගැනීම :- 2011/01/23 ඉරිදා ලංකාදීප

මාලිංග ටෙස්ට් පිටියෙන් සමුගනී

ඊයේ දිනයේදී මුත්තයියා මුරලිදරන්, ලෝක කුසලාන තරඟාවලියෙන් අනතුරුව ජාත්‍යන්තර ක්‍රිකට් පිටියෙන් සමුගැනීමේ නිවේදනය පළකල අතර, ශ්‍රී ලාංකේය ක්‍රිකට ලෝලීන් වෙතින් ඒ ශෝකය තුරන් වීමටත් මත්තෙන් තවත් එවැනිම දුක්බර පුවතක් අසන්නට ලැබේ. ඒ ලසිත් මාලිංග ටෙස්ට් පිටියෙන් සමුගැනීමට තීරණය කිරීමයි.

සිය දණ හිසේ කලක පටන් පවතින ආබාධ තත්වය මේ තීරණය ගැනීමට හේතු වූ බවයි 27 හැවිරිදි මාලිංග පවසන්නේ. ඔහුගේ අසම්මත පන්දු යැවීමේ ඉරියව්ව නිසා බොහෝ විට මේ ආබාධ තත්වය ඇතිවූයේ යැයි නිගමනයකට එළඹිය හැක. කෙසේ වුවත් තමන් තවදුරටත් පන්දුවාර 50 හා T20 ජාත්‍යන්තර තරඟ සඳහා සහභාගී වනබව හෙතෙම ප්‍රකාශ කළේය.

2004 වසරේ ජූලි 1 වනදා ඕස්ට්‍රේලියාව සමඟ, ඩ'ර්වින් හිදී පැවති තරඟයේදී ටෙස්ට් වරම් දිනූ මාලිංග, මේ වනවිට ශ්‍රී ලංකාව වෙනුවෙන් තෙවැනියට වැඩිම කඩුළු ගණනක් දවාගෙන ඇති ක්‍රීඩකයාය. ඒ තරඟ 30 කදී කඩුළු 101 ක් දවා ගනිමින්. එහිදී, ඔහුගේ හොඳම පන්දු යැවීම ලෙස වාර්තාවනුයේ පසුගිය ඉන්දීය කණ්ඩායමේ ශ්‍රී ලංකා සංචාරයේ දී ලකුණු 50 කට කඩුළු 5 ක් දවා ගැනීමයි.

වර්තමානයේ ශ්‍රී ලංකාවේ සිටින වේගවත්ම පන්දු යවන්නා වන මාලිංගගේ සමුගැනීමත් සමඟ ශ්‍රී ලංකා ටෙස්ට් පන්දු යැවීමේ බළෑණිය තව දුරටත් දුර්වල වෙයි. ශ්‍රී ලංකාව ඉතා හොඳ දඟ පන්දු යවන්නන්ගෙන් සමන්විත වුවද, හොඳ වේග පන්දු යවන්නන්ගේ අඩුවක් පවතී. ඕස්ට්‍රේලියාව, දකුණු අප්‍රිකාව වැනි රටවලදී ටෙස්ට් තරඟාවලි ජය ගැනීම සඳහා තීරණාත්මක සාධකය වනුයේ වේග පන්දු යවන්නන්ය.

අන්තර්ජාතික ක්‍රිකට් කවුන්සිලයේ තරඟ කාලසටහන අනුව මේ වසරේ අග ශ්‍රී ලංකාව දකුණු අප්‍රිකාවේ සංචාරයක් යෙදීමට නියමිතය. එහිදී වේග පන්දුයවන්නට විශාල කාරයයභාරයක් පැවරෙනු ඇත. එහිදී මාලිංගගේ අඩුව පුරවන්නේ දිල්හාර ප්‍රනාන්දු, තිලාන් තුෂාර හා වෙළගෙදර වැනි අත්දැකීම් බහුල නමුත් දවසේ රිද්මය අනුව දක්ෂතා පෙන්වන ක්‍රීඩකයෙක් ද සුරංග ලක්මාල්, දම්මික ප්‍රසාද්, නුවන් ප්‍රදීප් හා ශමින්ද එරංග වැනි අත්දකීම් අඩු, මතු බලාපොරොත්තු තැබිය හැකි ක්‍රීඩකයෙක්ද යන්න සිතා බැලීමට මේ වනවිටත් ප්‍රමාද වැඩිය.

යුගයක අවසානය ...

ලොව මෙතෙක් බිහිවූ ශ්‍රේෂ්ඨතම දඟ පන්දු යවන්නා වන මුත්තයියා මුරලිදරන්, 2011 ලෝක කුසලානයෙන් අනතුරුව ජාත්‍යන්තර ක්‍රිකට් පිටියෙන් සමුගන්නා බව අද නිලවශයෙන් මාධ්‍යය හමුවේ පවසා සිටීය. 38 හැවිරිදි මුරලි පසුගිය ජූලි මසදී ටෙස්ට් පිටියෙන් සමුගත් අතර, තවදුරටත් පන්දුවාර 50 හා T20 තරඟ ශ්‍රී ලංකාව වෙනුවෙන් ක්‍රීඩා කිරීම තම අපේක්ෂාව බව පැවසීය.

"මේ ලෝක කුසලාන තරඟාවලිය මම ජාත්‍යන්තර පිටියේ තරඟ වදින අවසාන තරඟාවලිය වේවි. සමුගැනීමට කාලය දැන් එළඹිල තියෙන්නෙ. තව වසර දෙකක් IPL තරඟාවලිය ක්‍රීඩාකිරීමට මම ගිවිසුම් අත්සන් කරල තිබෙන්නෙ. තව නවසීලන්තයේ හා එංගලන්ත ප්‍රාන්ත තරඟාවලි ක්‍රීඩාකිරීමටත් බලාපොරොත්තුවක් තියෙනවා."

1996 ලෝක කුසලාන ජයග්‍රාහී කණ්ඩායමෙන් මේවනවිට කණ්ඩායමේ සිටින එකම ක්‍රීඩකයාවන මුරලි, 2011 දී සිය සිව්වන ලෝක කුසලාන තරඟාවලියට සහභාගිවීමට බලාපොරොත්තුවෙයි.


මහනුවර ශාන්ත අන්තෝනි විද්‍යාලයේ ඉගෙනුම ලැබූ මුරලි, එහි ක්‍රිකට් පුහුණුකරු වූ සුනිල් ප්‍රනාන්දු මහතාගේ මග පෙන්වීම යටතේ ක්‍රිකට් අත්පොත් තැබීය. මේවන විට එක්දින ජාත්‍යන්තර තරඟ 339 කට ක්‍රීඩාකර ඇති මුරලි, එහිදී කඬුළු 517 ක් බිඳ දමමින්, එක්දින තරඟවල වැඩිම කඬුළු ලාභියා ලෙස වැජබෙයි. එහිදී ඔහුගේ හොඳම පන්දු යැවීම ලෙස සටහන් වන්නේ ඉන්දියාවට එරෙහිව ලකුණු 30 කට කඬුළු 7ක් දවා ගැනීමයි. මීට අමතරව T20 ජාත්‍යන්තර තරඟ 12 කට ක්‍රීඩාකර ඇති ඔහු කඬුළු 13 ක් දවාගැනීමට සමත්ව තිබේ.

ශ්‍රී ලංකාව වෙනුවෙන් ඉමහත් සේවයක් කළ මේ ශ්‍රේෂ්ඨ ක්‍රීඩකයාහට සුවහසක් ක්‍රීඩා ලෝලීන් වෙනුවෙන් Dil_Scoop අපගේ ආචාරය !
මුරලි ඔබට ස්තූතියි !!

ප.ලි. :- ලසිත් මාලිංග ටෙස්ට් තරඟ වලින් සමුගැනීමට තීරණය කර ඇති බවට පුවතක් ලැබී ඇත. වැඩි විස්තර බලාපොරොත්තුවන්න ..

yfm ක්‍රිකට් තේමා ගීතය.

දැන් ලෝක කුසලාන උණුසුමත් සමඟම හෝ ගාල ක්‍රිකට් සිංදු එනවනේ.. මොරාල් ටික නම් නැගල යනව. ඒත් කොතෙකුත් සිංදු අතර ඇඟට දැනෙන සිංදුවක් තිබුණද කියල බැලුවොත් ඒක ටිකක් හිතන්න ඕන නේ ආව ඔක්කොම වගේ වාණිජ පදනමෙන් වෙලෙඳපොලට ආපුව කිව්වොත් කීප දෙනෙක් හරි මා එක්ක එකඟ වෙයි.. මේ සියල්ල අතරට තරමක් හිතට සහ ඇඟට දැනෙන ගීතයක් මෙන්න ඇවිල්ල තියනව ගීතය කරල තියෙන්නෙ වයි.එෆ්.එම්. ආයතනයෙන්.. අහලම බලල ගුණ දොස් වර්ණනා කරමු බලන්න.

රට දිනවන හොඳම කණ්ඩායම

"ඔව් මට පුළුවන් ..." ශ්‍රී ලංකාවේ බොහෝ දෙනා විකුණාගෙන කන පාඨය මෙයයි. මේ පාඨය පාදක කරගෙන පැය ගණන් දේශනා තැබීම සහ රූපවාහිනී විකාශ කාලයන් වැය කිරීම සුලබය. මේ පාඨයේ කිසිම දෝශයක් හෝ අයහපතක් නැත. නිවැරදිව යොදාගතහොත් දියුණුවීමට මේ තරම් දෙයක් නැත. එහෙත් මෙය වැරදියට අර්ථදක්වා ගතහොත් ඔබ අපහසුවට පත්වීමට ඉඩ ඇතිබව පැහැදිළිය.

සනත් ජයසූරිය ශ්‍රී ලංකා එක්දින කණ්ඩායමෙන් ඉවත් විය යුතුයැයි මුලින්ම පුවත්පත් හරහා ලියද්දී නොයෙක් ආකාරයේ චෝදනා එල්ලවිය. එහෙත් සනත් ඉවත් විය යුතු යැයි අපි නිතරම කීවේ කරුණු දෙකක් මුල් කරගෙනය. පළමු වැන්න සනත් වැනි මහා චරිතයක් ඉවත් කළ යුතු අයකු නොව තමන්ගේ කැමැත්තෙන් ඉවත්විය යුතු නිසාය. දෙවැන්න ශ්‍රී ලංකාවේ ක්‍රිකට් ඉදිරියට යායුතු නිසාය. එහෙත් සනත් තමන් මහා චරිතයක් බව වටහාගත්තේ නැත. තමන්ගේ වටිනාකමේ ප්‍රමාණය නොදැනීම අනුවණ කමක් යැයි මා මේ තීරයේ ලියා ඇත්තේ වරක් දෙවරක් නොවේ. සනත් ගෞරවාන්විතව සමුගත යුතු යැයි මා ලීවේ කාලයක සිටය. එහෙත් අප වැනි මාධ්‍යකරුවන්ගේ හඬට කන්දීමට සනත් වැන්නන් නොසිතීම  නිසා ඔහුට "ඉවත් කර දමන ලදි" යන ලේබලය ගසා ගැනීමට සිදුවිය.

යළිත් මතක් කරන්නේ සනත් ශ්‍රී ලංකාවේ ක්‍රිකට් ක්‍රීඩාවට කළ සේවය ගැන තර්කයක් නැත. එය මිල කළ නොහැක. එහෙත් ඔහු කිරි කළයට ගොම බින්දුවක් දා ගත්තේය. "ඔව් මට පුළුවන්" කියා සනත් කීවාට "නැහැ ඔබට මේ මට්ටමට බැහැ" කියා අරවින්ද කීවේය. එය කවුරුත් ආදර්ශයට ගතයුතු තත්වයකි. එකම දෙය කරන සිය දෙනෙකුට ඔව් මට කියා සිතෙන්නට ඉඩ තිබේ. එහෙත් දහ දෙනෙකු තෝරාගනිද්දී මට පුළුවන් කිව්වාට මදිය. හොඳම දහය විය යුතුය.

සනත් පසුගිය කාලයේ දැඩිව උත්සාහ ගත්තේ ලෝක කුසලානයට ක්‍රීඩා කරන කණ්ඩායමට එක්වීමටය. 5 වතාවක් ලෝක කුසලානයට ක්‍රීඩා කර ඇති ක්‍රීඩකයෙකුට තවත් වතාවක් ක්‍රීඩා කරන්නට සිතෙන්නේ ඔහු ක්‍රීඩාවට ඇති දැඩි කැමැත්ත නිසා යයි කිව හැකිය. එහෙත් සනත් ඔහුගෙන්ම ඇසිය යුතු ප්‍රශ්නය වන්නේ එය එසේමද යන්නය. ඔහු වයස අවුරුදු 40 ඉක්මවූවකු යැයි කිව නොහැකි තරම් ශාරීරික යෝග්‍යතාවයෙන් පසුවන බව සත්‍යයකි. ඔහු සමඟ ශාරීරික යෝග්‍යයතාවයෙන් සමවන්නට ශ්‍රී ලංකා පිලේ එක් ක්‍රීඩකයෙකු හෝ දෙදෙනෙකුට වඩා නැත. එහෙත් සනත් ගේ  ක්‍රිකට් ඇඟෙන් ගහන ක්‍රිකට් නොවේ. සනත්ගේ ක්‍රිකට් ඇස සහ අත මත පදනම් වූ ක්‍රිකට්ය. මේ ගැන මා මීට පෙරත් ලියා ඇත. ඇසින් දකින වේගය වෙනදාට වඩා තත්පරයෙන් දාහෙන් එකකින් ප්‍රමාද වුවත් පන්දුව කඩුල්ල දක්වා යනු ඇත. එසේ නැත්නම් අවශ්‍යය පහර පමාවනු ඇත. සනත් මේ සරල යථාර්ථය තේරුම් ගත්තේ නැත. ඇඟේ හයිය සිතේ හයිය තිබුණාට මොළය පණිවුඩ යවන්නට යන්තම් හෝ පමාවේ නම් ප්‍රශ්නයකි.

සනත් මේ පාඩම දේශපාලනයේදී හෝ ඉගෙන ගෙන අනාගත රත්නසිරි වික්‍රමනායක කෙනෙකු නොවනවා නම් හොඳය.

මෙවර ලෝක කුසලාන තරඟාවලියට තෝරාගත් කණ්ඩායමේ බොහෝ තෝරා ගැනීම් ගැන අප එකඟය. එහෙත් පසුගිය සතියේ දී කියූ ආකාරයටම තරඟ 50ක් ක්‍රීඩාකර තිබීමේ සීමාව මෙහිදී සලකා බලා නැත. එහෙයින්ම තිසර පෙරේරා, තිලාන සමරවීර සහ චාමර කපුගෙදර යන තිදෙනාට අති විශාල වගකීමක් පැවරේ. තිසර පළමු එකොළොස් දෙනා අතර ක්‍රීඩා කරන බව පැහදිලිය. ශ්‍රී ලංකාව ඩිල්ෂාන්, උපුල්, සංගක්කාර, මහේල, සමරවීර, මැතිව්ස්, තිසර, නුවන්, මාලිංග, අජන්ත සහ මුරලි යන එකොළොස් දෙනාගෙන් ක්‍රීඩා කරන්නට යන බවද පැහැදිලිය. මෙහි වෙනසක් වේ නම් වනු ඇත්තේ එක් පන්දු යවන්නෙකු අඩු වී චාමරලා දෙදෙනා ගෙන් කෙනෙකු ඇතුලට පමිණීම සහ උපුල් අසාර්ථක වුවහොත් හෝ අනෙක් කණ්ඩායම් පුදුමයට පත්කිරීමට තිසර පෙරේරා ආරම්භක පිතිකරුවා වීමය. ඒ හැරෙන්නට මේ කණ්ඩායම නම් වන බව අපි දැන සිටියෙමු.

අජන්ත මෙන්ඩිස් මෙහිදී සුවිශේෂී සාධකයකි. මුරලි අවසන් එක්දින තරඟාවලි කීපයේදීම ප්‍රහාරයට ලක් වූයේය. මේ නිසා මුරලි ලෝක කුසලානයේ දී ද ප්‍රහාරයට ලක් වන්නට තිබෙන ඉඩ වැඩිය. ඒ අනුව මුරලි මේ තරඟාවලියේදී ප්‍රධාන ප්‍රහාරකයා නොවේ. මෙන්ඩිස් සහ මාලිංග ප්‍රධාන ප්‍රහාරකයෝ වෙති. මෙවර අන්තර් සමාජ තරඟාවලියේදී මෙන්ඩිස් ඉතා හොඳ රිද්මයකට පැමිණියද ජාත්‍යන්තර තරඟවල තට්වය වෙනස්ය. ඔහුව ඉතා හොඳින් තේරුම් ගැනීමට පිතිකරුවන් සූදානම්ය. එහෙත් දවසේ රිද්මය අනුව මෙන්ඩිස් ප්‍රතිවාදීන් විනාශකළ හැකි ක්‍රීඩකයෙකි. මේ තෝරා ගැනීම අතීතයේ සනත් ජයසූරිය පිතිකරුවකු ලෙස නම් කළ අවස්ථාවන්ට සමානය. එහෙත් එවැනි තෝරාගැනීතේරීම් කමිටුවට අවශ්‍යව තිබෙන්නේ විවිධත්වයක් සහිත  පන්දු යවන්නන්ය. ඒ ආකාරයෙන් බලනවිට මෙන්ඩිස් අසාර්ථක වුවහොත් අවශ්‍යය පා දඟ පන්දු යවන්නෙකු නිසා රංගන තෝරාගත් බව පැහැදිලිය.

එහෙත් එයට වඩා හොඳම රිද්මයේ සිටින පන්දු යවන්නන් තෝරා ගැනීම හොඳය. 1996 ලෝක කුසලාන තරඟාවලියේ දී හොඳම රිද්මය තිබුනේ අරවින්ද ද සිල්වා නම් පන්දු යවන්නාටය.

දිල්හාර තෝරා ගැනීම ගැන සියට සීයක් අප එකඟය. එහෙත් දිල්හාර මේ අවස්ථාවේ දී වත් තමන්ගේ හැකියාව ගැන තේරුම් ගත යුතුය. පෙර කියූ අයුරින් තමන් ගන මහා ඉහළින් සිතා සිටීම මෙන්ම තමන්ගේ හැකියාව කොතරම්ද කියා නොදැන එයින් නිසි ප්‍රයෝජන නොගැනීමද අනුවණකමකි. දිල්හාර මේ තත්වයෙන් මේ තීරණාත්මක තරඟාවලියේදී හෝ මිදෙනු ඇතැයි අප බලාපොරොත්තු වෙමු. චමින්ද වාස් කණ්ඩායමට නම් නොකරන්නට හේතු 3ක් තිබේ. පළමුවැන්න තිසර අතිසාර්ථකව ඉදිරියට ඒමයි. දෙවැන්න අරවින්ද කියූ ලෙසම නුවන් කුලසේකර ඉවත්කරන්නට බැරි තරම් දස්කම් දක්වා තිබීමයි. වාස්ට ඉඩ ඇත්තේ මේ ස්ථාන දෙකෙහි පමණි. තෙවැන්න ජයසූරියයි. යම් හෙයකින් වාස් නම් කළේ නම්, ජයසූරිය නම් නොකළේ ඇයිද යන ප්‍රශ්නය දරුණුව ඉදිරිපත් වීමේ හැකියාවක් තිබිණි. අරවින්ද පාදයක් පසුපසට ගෙන තමන්ගේ කඩුල්ල ආරක්ෂාකර ගත්තේය.

වේග පන්දු යවන්නෙකු, පන්දුව දෝලනය කරමින් පන්දු යවන්නෙකු, පන්දුවට පහර දිය හැකි මඳ වේග පන්දු යවන්නෙකු, මඳ වේග පන්දු යැවිය හැකි පිතිකරුවකු, විශිෂ්ඨ පිට දඟ පන්දු යවන්නෙකු සහ පා දඟ පන්දු යවන්නෙකු යන සැලැස්ම ඔස්සේ මෙවර ශ්‍රී ලංකා කණ්ඩායමේ පන්දු යැවීම නම් වෙයි. මෙය විවිධත්වය අතින් හොඳය. එහෙත් මා යළිත් මතක් කරන්නේ තිසර පෙරේරා හා අජන්ත යන දෙදෙනා ගැන අති විශාල බලාපොරොත්තු තබා ඇති බවයි. විශේෂයෙන්ම තිසරගේ පන්දු යැවීම තරඟයක තීරණයට දැඩිව බලපානු ඇතිබව මගේ හැඟීමයි. අරවින්ද නම් ජ්‍යේෂ්ඨයා පෙර කියූ පරිදි ලෝක කුසලාන තරඟයක පීඩනය දරා ගැනීමට තරඟ 50 ක් වත් ක්‍රීඩා කිරීම අවශ්‍යය වුවත් මේ තරුණයා තරඟ 15 ක් ක්‍රීඩා කර පිටියට බසියි. ඔහු එම පීඩනය ජය ගැනීම මත අනෙක් ක්‍රීඩකයන්ට පැටවෙන බර අඩු වැඩි වීම සිදුවෙයි. තිසර තරඟාවලියේ ශ්‍රී ලංකාව පැත්තෙන් තීරණාත්මක සාධකයයි. එහෙත් එය ඔහුට ඒත්තු නොගන්වා 1996 සනත් මෙන් තමන්ට කැමති ආකාරයකින් ක්‍රීඩා කරන්නට යැයි ඔහුට දැන්විය යුතුය. එසේම මඳ වේග පන්දු යවන තුන් ඉරියව් ක්‍රීඩකයෙකු වෙනුවට ජීවන් මෙන්ඩිස් වැනි දඟ පන්දු යවන තුන් ඉරියව් ක්‍රීඩකයෙකු ප්‍රශ්න පැන නොනඟින්නේ යැයි ලෝක කුසලානයෙන් පසුව කිසිවකුට කියන්නට සිදු නොවන ආකාරයෙන් ක්‍රීඩකයන් ක්‍රීඩා කළ යුතුව තිබේ.

පිතිකරුවන්ගේ පත්තෙන් චාමර කපුගෙදර තමන්ට ලැබුණු අවස්ථාව නිවැරදිව යොදාගත යුතුය. ඔහුට තරඟයක් හෝ ක්‍රීඩාකරන්නට අවස්ථාවක් ලැබේද යන්න සැක සහිතය. එහෙත් පසුගිය කාලයේ ජාත්‍යන්තර තරඟවලදී ඔහු දැක්වූ දස්කම් අනුව මෙය ඔහුට ලැබුණු හොඳම අවස්ථාවකි. දිල්හාර මෙන්ම ඔහුද තමන් තෝරා ගැනීම නිවැරදි බව ඔප්පු කළ යුතුය. ශ්‍රී ලංකාව පැත්තෙන් තවමත් මහේල ආරම්භක පිතිකරු ලෙස ක්‍රීඩා කරන්නේ නම් හොඳ බව අපේ අදහසයි. උපුල් තරංග අංක 3 ක්‍රීඩා කළහැකි ක්‍රීඩකයාය. විසයි විස්ස හා ටෙස්ට් තරඟවල කොතරම් දස්කම් දැක්වූවද මහේල එක්දින තරඟ වල තමන්ට කරන්නට හැකි දෙය කර නැත. ඒ ඔහුට නොගැලපෙන අංක 4 තුළ සිරගත කර ඇති නිසාය. ඔහු ඉනිම ආරම්භ කළ යුතුය. නැත්නම් අංක 3ට හෝ පැමිණිය යුතුය. මේ වෙනස්කම කිරීම ශ්‍රී ලංකාව පැත්තෙන් ඉතා යහපත් වෙයි. අනෙක් අතින් චාමර සිල්වා වෙනුවට තිලාන් සමරවීර ක්‍රීඩා කරයිනම් මහේල අංක 4 ක්‍රීඩා කිරීමේ කිසිම තේරුමක් නැත. හේතුව සමරවීර වැනි තාක්ෂණය නිවැරදි පිතිකරුවකු පිටුපස සිටීමයි. මේ නිසා පිතිකරු ලැයිස්තුව සකසද්දී ජ්‍යේෂ්ඨ ක්‍රීඩකයෙකු වශයෙන් තමන්ගේ බලය පාවිච්චි කර හෝ මුල් ස්ථාන 3 මහේල ඉල්ලා සිටිනවා නම් එය ඔහුටත් කණ්ඩායමටත් වන සේවයකි. මහේලට එම ස්ථාන නොලැබී ඔහු සාම්ප්‍රදායික අංක 4 ස්ථානයේ ක්‍රීඩා කරන්නේ නම් අංක 5 ස්ථානයේ සමරවීර සිටීමේ ප්‍රයෝජනයක් නැත. එසේ නම් චාමර සිල්වා හෝ කපුගෙදර ක්‍රීඩාකළ යුතුය. මීට වසර එකහමාරකට පමණ පෙර තිලාන් සමරවීර ශ්‍රී ලංකා එක්දින කණ්ඩායමට කැඳවා ගෙන ආවේ ලෝක කුසලානය වෙනුවෙන්මය. ඇත්තෙන්ම වර්ථමාන කණ්ඩායමේ සිටින ලෝක කුසලානය වෙනුවෙන්ම නිර්මානය කළ එකම ක්‍රීඩකයා සමරවීරය. එසේ නම් ඔහු ක්‍රීඩා කළ යුතුය. ක්‍රීඩා කළ යුත්තේ කණ්ඩායමට වැඩදායක ලෙසිනි.

මේ සියල්ල අතරේ ශ්‍රී ලංකා නායකයාට හිසේ කැක්කුමක් ඇතිබව පැහැදිලිය. එනම් තණතිලියි. සූරිය වැව සහ පල්ලෙකැලේ අමතක කරමු. ශ්‍රී ලංකාව ජයගතයුතුම තරඟ පැවැත්වෙන ආර්. ප්‍රේමදාස ක්‍රීඩාංගනයේ තණතිල්ල පළමු පෙළ තරඟයකටවත් සුදුසු නැති නව පැහැදිලිවම දැකගන්නට ලැබුණි. මෙවැනි තණතිල්ලක කොතරම් දක්ෂ කණ්ඩායමක් වුවත් නොසිතූ පරාජයන්ට ලක්වන්නට ඉඩ තිබේ. කොතරම් හොඳ කණ්ඩායමක් සුවිශේෂී සැලැස්මක් යටතේ ඉදිරිපත් කළද තණතිලි පිස්සු නටයි නම් ප්‍රයෝජනයක් නැත. තමන්ගෙ රටේ තරඟ පැවැත්වෙන අවස්ථාවක අලුත් තණතිලිවල ක්‍රීඩාකරන්නට යෑම තරම් අනුවණ කමක් තවත් නැත. එහෙත් අපේ රටේ නිරන්තරයෙන්ම සිදුවන්නේ මෙවැනි දෑය.

මේ අතර ක්‍රිකට් ලෝකයෙන් තවත් අපූරු කථාවක් ඇසෙයි. එනම් කොතරම් දස්කම් දැක්වූවත් ශ්‍රී ලංකාවේ කණ්ඩායමට ක්‍රීඩා කිරීමට නම් ඔහු "චාලීස් ඒන්ජල්ස්" කෙනෙකු වියයුතුය කියාය. ඒ ගැන වැඩිදුර සොයා බලන්නට අපි ඔබට පවරන්නේ එය අපූරු දෙයක් නිසාය.




අවසාන වශයෙන් සනත් සහ වාස් ගැනකියමු. පසුගිය සතියේ ඉරිදා දකුණු අප්‍රිකාව සහ ඉන්දියාව අතර පවති විසයි විස්ස තරඟය මකායා න්ටිනි ගේ අවසන් තරඟය විය. ඔහු වෙනුවෙන් ඒ තරඟය වෙන්විය. ක්‍රීඩාගාර මකාය නමින් නම්විය. තමන්ගේ රට වෙනුවෙන් යමක් කළ ජාතියක් පිබිදවූ ක්‍රීඩකයෙකුට දකුණු අප්‍රිකාව ප්‍රණාමය පුද කළේ එසේය. කොදෙව් දූපත් සමඟ පැවැත්වෙන තරඟාවලිය කෙසේ හෝ පවත්වා එක් තරඟයකට වාස් සහ සනත් නම් කර සනත් ආරම්භක පිතිකරු ලෙසත්, වාස් ආරම්භක පන්දුයවන්නා ලෙසත් ක්‍රීඩා කරවන්න යැයි අපි ඉල්ලමු. මේ සඳහා සුදුසුම තරඟය පළමු තරඟයයි. මාලිංග සහ උපුල් තරංග එක් තරඟයක් ක්‍රීඩා නොකලා කියා ප්‍රශ්නයක් නැත. ඔවුන් සිටින්නේ හොඳ රිද්මයකය. පසුගිය සතියේ කියූ පරිදි ලෝක කුසලාන කණඩායම කියා එම ක්‍රීඩකයන් තරඟ 3ක්ම ක්‍රීඩා කරන්නට අවශ්‍යය නැත. අප මේ කණ්ඩායම නම් කළේ එක් තරඟාවලියකට පමණි. එහෙයින් සනත් සහ වාස් ගේ සමුගැනීම උත්සවාකාරයෙන් සිදුකළ යුතුය. එය අත්‍යවශ්‍යය. ලෝක කුසලාන තරඟ පැවැත්වෙන ක්‍රීඩා පිටි නිම කරගන්නට බැරි අපේ පාලක මණ්ඩලයට මෙය කරන්නට හැකිවේද යන්න ප්‍රශ්නයකි.

උපුටා ගැනීම - ලංකාදීප 2011-01-16

වයස ප්‍රශ්නයක් නෑ සර්

අන්තර් පළාත් පන්දුවාර 50 ක්‍රිකට් තරඟාවලියේ රුහුණ හා ඌව කණ්ඩායම අතර තරඟය ඊයේ SSC පිටියේදී පැවති අතර, කාසියේ වාසිය දිනාගත් ඌව නායක තිළිණ කණ්ඩම්බිගේ ආරාධනයෙන් රුහුණ කණ්ඩායම පළමුව පන්දුවට පහරදෙන ලදි. ආරම්භක පිතිකරුවන්ලෙස පිටියට පිවිසි උපුල් තරංග හා සනත් ජයසූරියගේ ආරම්භක සබඳතාව ලකුණු 12කට සීමාකිරීමට මඳවේග පන්දු යවන කෞශල්‍යය වීරරත්න සමත් විය. ඒ තරංග ලකුණු 11 දී ඉයන් ඩැනියල් අතට උඩපන්දුවක් ලබාදීමත් සමඟ. අනතුරුව පිටියට එක්වූ ගිහාන් රූපසිංහ, ජයසූරිය සමඟ ලකුණු 53ක සබඳතාවක් ගොඩනැඟීය. තරඟයේ 13 ව පන්දුවාරයේදී රූපසිංහ පිට දඟ පන්දු යවන ජනක ගුණරත්නගේ පන්දුවකට දැවී ගිය අතර, අනතුරුව කෞශාල් සිල්වා හා ජයසූරිය ලකුණු 115ක අඟනා සබඳතාවක් ගොඩනැඟීමට සමත්විය. ප්‍රවීන ක්‍රීඩක සනත් ජයසූරිය තරඟයේ සුවිශේෂී ඉනිම ක්‍රීඩා කළේය. හේ පන්දු 111ක් තුළදී අඟනා ලකුණු 97 කින් ඉනිම වර්ණවත් කළේය. හතරේ පහර 10ක් ඔහුගේ ඉනිමට අඩංගුවිය. මෙය ජයසූරියගේ අවසන් පළාත් තරඟාවලිය වීමට බොහෝ දුරට ඉඩ තිබේ. කෙසේහෝ චාමර සිල්වා, ජීවන් මෙන්ඩිස් හා චින්තක ජයසිංහ මැදපෙළ ශක්තිමත් කළෝය. ඌව කණ්ඩායම වෙනුවෙන් මාලිංග බණ්ඩාර ලකුණු 50 කට කඩුළු 4ක් දවා ගැනීමට සමත්විය. ඩිල්හාර ප්‍රනාන්දු හට මෙම තරඟය බියකරු සිහිනයක් බවට පත්විය. ජයසූරියගේ පිතිහරඹය හේතුවෙන් ඩිල්හාරගේ පන්දුවාර 10 තුළ ලකුණු 86ක් ලබාගැනීමට රුහුණ කණ්ඩායම සමත්විය. මේ අනුව රුහුණ කණ්ඩායම සිය පන්දුවාර 50 ඇතුළත කඩුළු 8ක් දැවී, ලකුණු 285ක් ලබා ගැනීමට සමත්විය.

ජයසූරිය - ලකුණු 97 , පන්දු 111
කෞශාල් සිල්වා - ලකුණු 42 , පන්දු 69
ජීවන් මෙන්ඩිස් - ලකුණු 37 , පන්දු 33
චාමර සිල්වා - ලකුණු 31 , පන්දු 23

මාලිංග බණ්ඩාර  - කඩුළු 4 , ලකුණු 50 , පන්දුවාර 10
ජනක ගුණරත්න - කඩුළු 1 , ලකුණු 37 , පන්දුවාර 10
ශමින්ද එරංග - කඩුළු 1 , ලකුණු 45 , පන්දුවාර 10
කෞශල්‍යය වීරරත්න - කඩුළු 1 , ලකුණු 35 , පන්දුවාර 6
ඩිල්හාර ප්‍රනාන්දු - කඩුළු 1 , ලකුණු 86 , පන්දුවාර 10

ලකුණු 286ක ජයග්‍රාහී ඉක්කය හඹායාමට පිටියටබට ඌව ආරම්භක පිතිකරු යුගලයවූයේ තරංග පරණවිතාන හා මහේල උඩවත්තයි. ඉනිමේ තෙවන පන්දුවාරයේදී පරණවිතාන ලකුණු 10කට දැවීගිය අතර, අනතුරුව උඩවත්ත හා එක්වූ ඉයන් ඩැනියල් ලකුණු 42ක සබඳතාවක් ගොඩනැඟීමට සමත්විය. මහේල උඩවත්ත අඟනා අර්ධ ශතකයකින් හා නායක කණ්ඩම්බි ලකුණු 24කින් ඌව ඉනිම ගොඩනැඟීමට උත්සාහකළද, සෙසු කිසිදු පිතිකරුවකුට ලකුණු 16 ඉක්මවිය නොහැකිවිය. ඉනිමේ 30වන පන්දුවාරයේදී අයහපත් ආලෝක තත්වයමත තරඟය නතරකිරීමට විනිසිරුවන් තීරණයකළ අතර, ඒ වනවිට ඌව කණ්ඩායම කඩුළු 7ක් දැවී ලකුණු 131ක් රැස්කරගෙන සිටියහ. ඩක්වත් හා ලුවිස් න්‍යාය අනුව ඌව කණ්ඩායම ඒවන විට තරඟය ජයගැනීම සඳහා ලකුණු 227ක් ලබාගතයුතුව තිබුණි. ඒ අනුව ලකුණු 95ක ජයක් රුහුණ කණ්ඩායම ලැබීය.

මහේල උඩවත්ත - ලකුණු 50 , පන්දු 63
කණ්ඩම්බි - ලකුණු 24 , පන්දු 22

චින්තක ජයසිංහ  - කඩුළු 2 , ලකුණු 30 , පන්දුවාර 9
සචිත්‍ර සේරසිංහ - කඩුළු 2 , ලකුණු 31 , පන්දුවාර 7
සුරංග ලක්මාල් - කඩුළු 2 , ලකුණු 34 , පන්දුවාර 6
සුරාජ් රන්දීව් - කඩුළු 1 , ලකුණු 28 , පන්දුවාර 6


මේවනවිට සියලු කණ්ඩායම් තරඟ 2 බැගින් ක්‍රීඩා කර , එක් තරඟය බැඟින් ජය ගෙනතිබේ. නමුත් , කඳුරට කණ්ඩායම හා රුහුණ කණ්ඩායම පිළිවෙලින් ප්‍රථම හා දෙවන ස්ථාන වල, ප්‍රසාද ලකුණු සමඟ ජයග්‍රහන වාර්තාකිරීම හේතුවෙන් රැඳීසිටී. තරඟාවලියේ මීළඟ තරඟය වයඹ කණ්ඩායම හා කඳුරට අතර අද SSC පිටියේදී පැවැත්වීමට නියමිතය.

ඩිලීට කිරි සංගට කැකිරි...!

අපි කවුරුත් ආදරේට "ඩිලී" කියන අපේ ඩිල්ෂාන් ඔන්න හොඳටම ෆෝර්ම් එකට ඇවිල්ල. වර්ල්ඩ් කප් ගහන්න එන සුද්දොන්ටයි ඉන්දියන් කාරයොන්ටයි ඉතින් දෙයියන්ගෙම පිහිටයි..! බැට් එකෙන් විතරක් නම් කමක් නෑ මේ පාර බෝලෙනුත් වැඩ පෙන්නල..

ඒ විතරක් යැ අද ඩිල්ෂාන්ට සුවිශේෂී දවසක් වෙනව . ඇයි එයා රංගනයෙන් දායක වෙන පළමු ෆිල්ම් එක "සිංහාවලෝකනය" අද සිට දිවයින පුරා ඊ.ඒ.පී. සිනමාහල් වල තිරගත වෙන්න පටන් ගත්ත.
   අන්තර් පලාත් සීමිත ඕවර තරඟාවලියේ අද බස්නාහිර සහ කඳුරට අතර පැවති තරඟයෙන් ඩක්වත් ලුවිස් ක්‍රමය අනුව බස්නාහිරට ලකුනු 3ක තියුණු ජයක් හිමි වුනා. ඩිලී බෝයි බස්නාහිරට නායකත්වය සැපයූ අතර කැප්ටන් සංගා කඳුරට මෙහෙයවූවා. කාසියේ වාසිය සංගා ලබා ගනිද්දි ප්‍රථමයෙන් පන්දුවට පහර දුන් බස්නාහිර පන්දුවාර 50 අවසනදී සියල්ල දැවී ලකුනු 58ක් ලබා ගත්ත ඩිල්ශාන් / වාස් වගේම ඩිල්ශාන්ගෙ මල්ලි තිලකරත්න සම්පත් සුපිරි පිතිහරඹයක නිරත වුනා.

 පිළිතුරු ඉණිමෙදී කඳුරට පන්දුවාර 42 කදු කඩුලු 5ට ලකුනු 199යි. ඊට පස්සෙ වැස්ස. ඔන්න ආව ඩක්වත් සහ ලුවිස් දෙන්න ඒ දෙන්නත් අද ඩිල්ශාන්ගෙ පැත්තෙ. බස්නාහිරට ලකුනු 3ක ජයක් හිමි වුනා. හැබයි සංගත් සුපිරි පිතිහරඹෙක යෙදුන ලකුනු 84 ක් ලබගත්ත. ඩිල්ශාන් පන්දුවෙනුත් දස්කම් පෑව  පන්දුවාර 7ක් යවල ලකුනු 19ක් පමණක් ලබාදීල විකට්ටුවක් ලබා ගත්ත.

අපේ කොල්ලොන්ගෙ ෆෝර්ම් එක නම් සුපිරියි....!!!

ලකුනු සටහන

බස්නාහිර 258/10 (50)

වාස් 57, ඩිල් 52, තිලකරත්න සම්පත් 76 || විදානපතිරන 41/3

කඳුරට 199/5(42)

සංගක්කාර 84,යොහාන් ද සිල්වා 40 || ඩිල් 19/1 ,මැතිව්ස් 19/1

වයඹ පරදා ඌවට කඩුලු 8ක ජයක්..!

අන්තර් පලාත් සීමිත ඕවර තරඟාවලියේ ඊයේ පැවති තරඟයෙන් කඩුලු 8ක විෂිෂ්ට ජයක් ඌව කණ්ඩායමට හිමි විය. ඒ අනුව ප්‍රසාද ලකුනු සටහනේ පෙරමුණේ පසු වූ වයඹ කණ්ඩායම 3වන ස්ථානය දක්වා පහත වැටුණි.
            කාසියේ වාසිය දිනූ ඌව නායක තිලිණ කණ්ඩම්බිගේ ආරාධනයෙන් පන්දුවට පහරදීමට පැමිණි වයඹ ක්‍රීඩකයින් පන්දුවාර 44.5 කදී සියල්ලන් දැවී රැස්කරගැනීමට හැකි වූයේ ලකුණු 199ක් පමණි.
   පිළිතුරු ඉණිම ක්‍රීඩාකළ ඌව ආරම්භක පිතිකරු යුගලය ඉතා මැනවින් තරඟය තමන් නතු කරගනිමින් පන්දුවට පහර දුන් අතර ඌව සිය ඉලක්කය කඩුලු 2ක් පමණක් දැවී තිබියදී සපුරා ගන්න ලදී.
                විශිෂ්ට පිතිහරඹයක නිරතවූ මහේල උඩවත්ත පන්දු 125 කින් ලකුණු 90ක් ද තරන්ග පරණවිතාන පන්දු 105කින් නොදැවී ලකුනු 88ක් ද රැස්කරමින් දස්කම් පෑහ.


----වයඹ 199/10 (ඕවර 44.5)---
දිමුත් කරුණාරත්න 52(82) |මහේල ජයවර්ධන 28(41)
ශමින්ද එරංග 31/3 | ජනක ගුනරත්න 24/2
----ඌව 200/2 (ඕවර 42.3)---
මහේල උඩවත්ත 90(125) |තරංග පරණවිතාන 88*(105)
රංගන හේරත් 37/2

***කඳුරට සහ බස්නාහිර අතර තරඟය අද කොලඹ එස් එස් සී පිටියේදී පැවැත්වීමට නියමිතයි..

ලෝක කුසලාන එන සිම්බාබ්වේ සංචිතය.

සිම්බාබ්වේ ලෝක කුසලාන සංචිතය අද දින , හිටපු ක්‍රීඩක වත්මන් සභාපති ඇලස්ටෙයාර් කැම්බල් විසින් එලිදක්වනු ලැබුවා...
එල්ටන් චිගුම්බුරා නායකත්වය සපයන සිම්බාබ්වේ කණ්ඩායම , එක්දින ශ්‍රේණිගතකිරීම් වල ප්‍රසාද ලකුනු 34ක් සමඟින් 11 වන ස්ථානයේ පසුවෙයි.
   කෙසේ වෙතත් ජ්‍යේෂ්ට ක්‍රීඩක ආරම්භක පිතිකරු හැමිල්ටන් මැසැකඩ්සා මෙම ක්‍රීඩකයින් පහළොස් දෙනා අතරට සුදුසුකම් නොලබා ඇති අතර සිම්බාබ්වේ ක්‍රීඩා ලෝලීන් ඒ පිළිබඳව මහත් අප්‍රසාදය පලකොට ඇති බව වාර්තා වෙයි. ඔහු වෙනුවට වමත් පිතිකරු සීන් අර්වින් නම් කර තිබෙයි.

• එල්ටන් චිගුම්බුරා (නායක )
• රෙජිස් චකාබ්වා
• චාර්ල්ස් කවෙන්ට්‍රි
• ග්‍රැහැම් ක්‍රීමර්
• ක්‍රේග් අර්වින්
• සීන් අර්වින්
• ග්‍රේග් ලෑම්බ්
• ශිංගිරායි මසැකඩ්සා
• ක්‍රිස් ම්පුෆු
• රේ ප්‍රයිස්
• එඩ් රේන්ස්ෆෝර්ඩ්
• ටටෙන්ඩා ටයිබු
• බ්‍රෙන්ඩන් ටේලර්
• ප්‍රොස්පර් උට්සෙයා
• සීන් විලියම්ස්

කඳුරටට පහසු ජයක් !

එළඹෙන ලෝක කුසලාන තරඟාවලියට පෙර සූදානමක් ලෙස පවැත්වෙන අන්තර් පළාත් පන්දුවාර 50 තරඟාවලියේ , කඳුරට කණ්ඩායම හා රුහුණ කණ්ඩායම අතර තරඟය අද SSC පිටියේදී පැවැත්වීය. කඳුරට කණ්ඩායමේ නායකත්වය කුමාර සංගක්කාර දැරූ අතර උපුල් තරංග රුහුණ කණ්ඩායම මෙහෙයවීය. කාසියේ වාසිය දිනාගත් රුහුණ කණ්ඩායමේ ආරාධනයෙන් කඳුරට කණ්ඩායම පළමුව පන්දුවට පහර දෙන ලදි.

ආරම්භක පිතිකරුවන් ලෙස පිටියට පිවිසි යොහාන් ද සිල්වා හා සමන් ජයන්තටගේ ආරම්භක සබඳතාව ලකුණු 8 කට සීමා කිරීමට සුරංග ලක්මාල් සමත්විය. ඒ අනුව යොහාන් පළමු කඩුල්ල ලෙස ලකුණු 6 කට දවී ගියේය. අනතුරුව පිටියට එක්වූ නායක සංගක්කාර , සමන් ජයන්ත සමඟ අඟනා ලකුණු 90 ක සබඳතාවක් පැවත්වීය. චින්තක ජයසිංහ තරඟයේ 20 වන පන්දුවාරයේදී ජයන්ත ලකුණු 31 කට දවා ගැනීමට සමත්වූ අතර, ඉන් පසුව චාමර කපුගෙදර , සංගක්කාර හා එක්ව ලකුණු 43 ක සබඳතාවක් ගොඩනැඟීය.අනතුරුව පන්දුයැවීමට එක්වූ ප්‍රවීන ක්‍රීඩක සනත් ජයසූරිය විසින් සංගක්කාර හා කපුගෙදර පිළිවෙලින් තරඟයේ 31 වන හා 35 වන පන්දුවාර වලදී දවාගන්නා ලදි. ඉන්පසුව කඳුරට කණ්ඩායම වෙනුවෙන් ජෙහාන් මුබාරක් හා යොවුන් ක්‍රීඩක අන්ජලෝ පෙරේරා ලකුණු 77ක අනගි සබඳතාවකින් ඉනිම ගක්තිමත් කළෝය. ඒ අනුව පන්දුවාර 50 අවසානයේ කඳුරට කණ්ඩායම ලකුණු 268 ක් ලබාගැනීමට සමත්විය.


සංගක්කාර - ලකුණු 68 , පන්දු 109
සමන් ජයන්ත - ලකුණු 31 , පන්දු 45
කපුගෙදර - ලකුණු 25 , පන්දු 34
මුබාරක් - ලකුණු 42 , පන්දු 42
ඇන්ජලෝ පෙරේරා - ලකුණු 62* , පන්දු 61

සුරංග ලක්මාල්  - කඩුළු 3 , ලකුණු 48 , පන්දුවාර 9
ජයසූරිය - කඩුළු 2 , ලකුණු 31 , පන්දුවාර 8
චින්තක ජයසිංහ - කඩුළු 1 , ලකුණු 39 , පන්දුවාර 10
ඉසුරු උදාන - කඩුළු 1 , ලකුණු 52 , පන්දුවාර 7


ලකුණු 269 ක ජයග්‍රාහී ඉලක්කය හඹා යාමට පිටියට පිවිසි රුහුණු ආරම්භක පිතිකරුවන්ගේ ආරම්භක සබඳතාව ලකුණු 24 කි. ඒ යොවුන් ක්‍රීඩක චතුර පීරිස් හමුවේ නායක තරංග දැවීයාමත් සමඟයි. අනතුරුව පිටියට පිවිසි පිතිකරුවන්හට වැඩිවේලාවක් පිටියේ රැදීමට කඳුරට පන්දුයවන්නන්ගෙන් අවස්ථාවක් නොලැබුණි. විශේෂයෙන්ම නුවන් කුලසේකර පන්දුවාර 6 ක් තුළදී ලකුණු 10 ක් පමණක් ලබාදෙමින් එක් අන්තයකින් පීඩනය රුහුණ කණ්ඩායමට යෙදීම, සෙසු පන්දුයවන්නන්හට කඩුළු ලබාගැනීම පහසු කරවීය. ආරම්භක පිතිකරු ලෙස පිටියට පිවිසි සනත් ජයසූරිය, තරඟයේ 14 වන පන්දුවාරයේදී දවා ගැනීමට මුත්තයියා මුරලිදරන් සමත්විය. අනතුරුව අයහපත් ආලෝක තත්වයමත තරඟය 25 වන පන්දුවාරයේ පළමු පන්දුවෙන් පසු නතරකිරීමට විනිසුරුවන් තීරණය කළ අතර, ඒ වනවිට රුහුණ කණ්ඩායම කඩුළු 7ක් දැවී ලකුණු 115ක් ලබා සිටියේය. රුහුණ කණ්ඩායම වෙනුවෙන් සාර්ථකවූ එකම පිතිකරු ලෙස නම් කළහැක්කේ චාමර සිල්වායි. ඔහු පන්දු 37 කින් නොදැවී ලකුණු 34ක් රැස්කිරීය. මීට අමතරව පන්දු 48 කින් 29 ක් රැස්කරමින් ජයසූරිය යම් සාරථකත්වක් දක්වීය.


ජයසූරිය - ලකුණු 29 , පන්දු 48
චාමර සිල්වා - ලකුණු 34* , පන්දු 37

චමින්ද විදානපතිරණ - කඩුළු 2 , ලකුණු 13 , පන්දුවාර 4.1
චතුර පීරිස් - කඩුළු 2 , ලකුණු 32 , පන්දුවාර 5
නුවන් කුළසේකර - කඩුළු 1 , ලකුණු 10 , පන්දුවාර 6
මුරලිදරන් - කඩුළු 1 , ලකුණු 33 , පන්දුවාර 6
කපුගෙදර -කඩුළු 1 , ලකුණු 22 , පන්දුවාර 3


කෙසේ නමුත් අවසානයේ ඩක්වර්ත් හා ලුවිස් න්‍යාය අනුව ලකුණු 96 කින් තරඟය ජය ගැනීමට කඳුරට කණ්ඩායම සමත්විය.

තරඟාවලියේ මීළඟ තරඟය ඌව කණ්ඩායම හා වයඹ අතර හෙට SSC පිටියේදී පැවැත්වේ.

මේක ආයේ බලන්න ආසද..?

කාලෙකින් දැක්කෙ නැති අයිතමයක්.....!!

කට්ටිය පුන පුනා බලන් හිටපු මේක මේ පාර වර්ල්ඩ් කප් එකේදි ප්ලේ වෙනව බලන්න කවුරු කවුරුත් ආස ඇතිනේ... 

මේක ආයෙ ප්ලේ කරන එකේ රිස්ක් එකක් තියනව ද නැද්ද කියල දාමු බලන්න ෆීඩ් බැක් එකක්...

අන්තර් පලාත් ක්‍රිකට් වසන්තය ඇරඹෙයි....!

ශ්‍රී ලංකා අන්තර් පලාත් ක්‍රිකට් තරඟාවලිය අද කොළඹ SSC පිටියේදී ඇරඹිණි.
  මෙවට පලාත් තරඟාවලියට ගියවර තරඟ නොකල ඌව කණ්ඩායම නැවතත් එක්වීම විශේෂත්වයකි. එමෙන්ම ගියවර බස්නාහිර උතුර සහ දකුණ ලෙස කාණ්ඩ 2කින් තරඟ කල බස්නාහිර මෙවර එක් කණ්ඩායමකට සීමාවී ඇත. තරඟාවලියට සහභාගි වන සෙසු කණ්ඩායම් අතර රුහුණ සහ කඳුරට වෙයි. මෙවර කණ්ඩායම් වලට තරඟවදින ක්‍රීඩකයන්ගේ ද වෙනසක් සිදුවී ඇති අතර නවතම සංයුතියකින් කණ්ඩායම් 5 නිර්මාණය වී තිබේ.....
     තරඟාවලියේ ආරම්භක තරඟයේදී ඩක්වත් ලුවිස් න්‍යාය අනුව බස්නාහිර පැරදවමින් වයඹ පලාත් කණ්ඩායම ලකුනු 47ක ජයක් හිමිකරගනිමින් ප්‍රසාද ලකුණු සටහනේ පෙරමුණ ගැනීමට සමත් විය.
  මෙවර බස්නාහිරට නායකත්වය තිලකරත්න ඩිල්ෂාන් දක්වන අතර වයඹ කණ්ඩායම මෙහයවන්නේ මහේල ජයවර්ධන විසිනි. වර්ෂාව හේතුවෙන් තරඟය පන්දුවාර 43කට සීමා විණි.
කාසියේ වාසිය දිනාගත් වයඹ නායක ජයවර්ධනගේ ඇරඹුමෙන් ප්‍රථමයෙන් පන්දුවට පහර දීමට පිටියට පිවිසි බස්නාහිර කණ්ඩායම සිය පන්දුවාර 43 නිමාවෙද්දී කඩුලු 9කට ලකුනු 217ක් රැස්කිරීමට සමත් විය.
තිලකරත්න ඩිල්ෂාන් 58 , රොශේන් සිල්වා 40* , චමින්ද වාස් 29
වෙලගෙදර 54/3 , සේනානායක 37/3 , හේරත් 38/2 

පිළිතුරු ඉණිම ඇරඹූ වයඹ කණ්ඩායමට මුහුණදීමට හැකිවූයේ පන්දුවාර 29.1 කට පමණි. අයහපත් කාලගුනය නිසා තරඟය නතර කරන විට වයඹ  ලකුනු 166ක් කඩුලු 2ක් පමණක් දැවී රැස්කරගැනීමට සමත් විය
දිනේෂ් චන්දිමාල් 92* , මහේල ජයවර්ධන 55*
චමින්ද වාස් 31/1
කඳුරට සහ රුහුණ අතර තරඟය හෙට එස් එස් සී පිටියේදී පැවැත්වෙයි..

IPL කණ්ඩායම් වල නියමුවන් කවුරුන්ද..?

පසුගිය දා නිමාවූ IPL  ක්‍රීඩකයන් වෙන්දේසියත් සමගම දැන් දැන් IPL උනුසුමත් ලෝක කුසලාන තරඟාවලිය තරම්ම ලොව පුරා පැතිරෙන්නට පටන් ගෙන ඇත.
   පුරා වසර 3ක් ඩෙකෑන් කණ්ඩායමට නායකත්වය ලබා දුන් හිටපු ඕස්ට්‍රේලියානු ආරම්භක පිතිකරු ඇඩම් ගිල්ක්‍රිස්ට් හෙවත් ගිලී මෙවර වෙන්දේසියේදී පන්ජාබ් කණ්ඩායම විසින් මිලට ගනු ලැබීය. ඒ අනුව පන්ජාබ් කණ්ඩායමේ නායකත්වය ගිලීට හිමිවී ඇති බව ක්‍රීඩා ආරංචි මාර්ග දක්වයි..
එමෙන්ම මුම්බායි, දිල්හි සහ චෙන්නායි කණ්ඩායම් වල නායකයින්ගේ වෙනසක් සිදුව නැති අතරඅනෙකුත් කණ්ඩායම් වල නායකයින් මෙතෙක් නම් කර නැතත්  එම කණ්ඩායම් වල සිටින ප්‍රබල ක්‍රීඩකයින් ගැන මදක් විමසා බලමු...

• කිංග්ස් XI පන්ජාබ් - ඇඩම් ගිල්ක්‍රිස්ට්
• මුම්බායි ඉන්දියන්ස් - සචින් ටෙන්ඩුල්කාර්
• දිල්හි ඩෙයර් ඩෙවිල්ස් - විරේන්ද්‍ර ශෙවාග්
• චෙන්නායි සුපර් කිංග්ස් - මහේන්ද්‍ර සිං දෝනි
• ටීම් කොචි - මහේල ජයවර්ධන | ලක්ෂ්මන් | බ්‍රෙන්ඩන් මැකලම් | මුරලිදරන්
• පූනෙ වොරියර්ස් - ග්‍රැහැම් ස්මිත් | යුවරාජ් සිං 
• ඩෙකෑන් චාර්ජර්ස් - කුමාර් සංගක්කර | කැමරන් වයිට්
• රෝයල් චැලෙන්ජර්ස් බැංගලෝර් - තිලකරත්න ඩිල්ෂාන් | විරාට් කෝලි | ඩැනියෙල් විටෝරි | ඒ.බී.ඩිවිලියර්ස් | සහීර් ඛාන්
• කොල්කටා නයිට් රයිඩර්ස් - ගෞතම් ගාම්භීර්
• රාජස්තාන් රෝයල්ස් - රාහුල් ඩ්‍රාවිඩ් | ශේන් වෝර්න් | රොස් ටේලර්

" සනත් - වාස් " ගේ අඩුව ක්‍රීඩා ලෝලියෙකුගේ කෝණයෙන්.

2011 ක්‍රිකට් ලෝක කූසලානයට සියල්ල කඩිමුඩියේ මේ දිනවල සූදානම් වෙමින් පවතින මොහොතක ශ්‍රි ලංකා ක්‍රිකට් පාලක මණ්ඩලය විසින් පසුගියදා තම ලෝක කුසලාන කණ්ඩායම මාධ්‍ය වෙත නිකූත් කලේය. ඔබ දැනටමත් එම කණ්ඩායම හොඳාකාරවම දන්නා බව අපි දනිමු. මේ කණ්ඩායමට කැමැත්ත සහ අකමැත්ත දක්වන බොහෝ පිරිසක් වෙති. අකමැත්ත දක්වන පිරිස එක එකහෙලාම පවසන්නේ සනත් ජයසුරිය සහ චමින්ද වාස් එම කන්ඩායමට ඇතුලත් කරගත යුතු බවයි. එය අපට පෙනෙන ලෙසටනම් සාදාරනය. සනත් වෙනුවට එම කන්ඩායමට ඇතුලත් කර ඇත්තේ රංගන හේරත්ය. රංගන වෙනුවට සනත් ආදේශ කරානම් එය කිසි ලෙසක අපට අවාසි දායක වන්නේ නැත. මන්ද සනත්, රංගන වෙනුවට කන්ඩායමට ආවානම් පැමිනෙන්නේ මැදපෙළ පිතිකරුවෙකු ලෙස සහ වමත් දඟ පන්දු යවන්නෙකු ලෙසය. එලෙස බලන විට සනත් රංගනට වඩා බොහෝ ඉදිරියෙනි. රංගන තවමත් එක්දින ජාත්‍යන්තර තරඟ වලදී සනත් තරම් පදම් වී නොමැත. ( රංගන එක්දින තරඟ 9යි. සනත් තරඟ 444යි). සනත් ලකුනු අතර නැති බව සැබෑය. එහෙත් කඩුලු අතර සිටී. මැද පෙළ සිට Batting Power Play එකේදී හෝ ක්‍රියාත්මක වී වේගයෙන් ලකුනු තිහ හතළියක් ලබා ගැනීමට බැරුවා නොවේ. එහෙත් එය හේරත්ගේ පැත්තෙන් බැලුකල අහස පොළොව සේ වෙනස්ය. එය ඔබ ඔබේ හිතට එකඟව දන්නා කරුනකි. එහෙයින් ජයසූරිය රංගනට වඩා ගව් ගනනක් ඉදිරියෙනි. එහෙත් අවාසනාවට කුමන හේතුවක් මත හෝ තේරීම් කමිටුවට තවමත් නොතේරී ඇත. 
එන්ගලන්ත ප්‍රාන්ත තරගාවලියේදී හොදම ක්‍රීඩකයා වුයේ චමින්ද වාස්ය. එහෙත් ඔහුට කණ්ඩායමේ ස්ථානයක් හිමි නොවූහ. බොහෝ දෙනෙක් පවසන්නේ දිල්හාර වෙනුවට වාස්ව ආදේශ කරන්නට තිබූ බවය. මෑතකදී දිල්හාර වාස් තරම් දක්ශතා දක්වා නොමැත. පිතිකරන පැත්තෙනුත් දිල්හාරට වඩා වාස් ඉදිරියෙන් සිටින බව මා ද ඔබද හොඳින් දන්නා කරුනකි. මෙවර අන්තර් සමාජ තරගාවලියේදී දිල්හාර ලකුනු 164ක් දි කඩුලු 8ක් දවාගනිද්දි වාස් ලකුනු 117ක් දි කඩුලු 9ක් දවාගෙන සිටි. එතෙනිනුත් පැහැදිලි වන්නේ දිල්හාරට වඩා වාස් ඉදිරියෙන් බවය. වාස් මේ තරගාවලියේදීද මීට පෙර ක්‍රීඩා කරන ලද එන්ගලන්ත ප්‍රාන්ත තරගාවලියේදීද ඉතා හොදින් ක්‍රීඩා කර ඈති බව අපට පෙනී යයි. වාස්ට වඩා දිල්හාරගේ වේගය වෑඩි බව අපි දනිමු. එහේත් ඔහුගේ පන්දුවේ වාස්ගේ තරම් දෝලනයක් සහ පාලනයක් නොමැත. තේරීම් කමිටුවට පන්දුවේ දෝලනයට වඩා වේගය අවශ්‍ය නම් දිල්හාරව ඇතුලත් කර ගත්තාට කමක් නැත. එහෙත් එයට ලසිත් මාලින්ගද සිටිති. අපට මෙතරම් වේග පන්දු යවන්නන් අවශ්‍යමත් නොමැත. මන්ද අපට ලැබී ඇති තණතීරුද මන්දගාමී තණතීරු වේ. එසේනම් අපට තවත් දෝලනයක්/පාලනයක් නොමැති වේග පන්දු යවන්නෙකුට වඩා වේගයත් සමග පන්දුව දෝලනයක් කල හැකි පන්දු යවන්නෙකු ලෙස වාස්ව ඇතුලත් කරගැනීමට තේරීම් කමිටුවට අවස්ථාව තිබුනි. එහෙත් එය එසේ නොවුනි. මේ වරද නැවත නිවැරදි කර ගැනීමට තවමත් කාලය තිබේ.
පන්දු යවන්නෙකු ලෙස සනත්ට වඩා පහළින් සිටින ක්‍රීඩකයිනුත් පිතිකරුවෙකු ලෙස වාස්ට වඩා පහළින් සිටින ක්‍රීඩකයිනුත් මේ කණ්ඩායමේ සිටී. මෙය ලෝක කුසලාන තරඟාවලියකි එහෙයින් මෙහිදී අත්හදා බැලීම් නොකල යුතුය.
ස්තූතියි!!

මීට මහේෂ් මධුසංඛ.


මෙම ලිපීයේ සියලු අයිතිය මහේෂ් මදුසංඛ සතුයි.

කෝල්ට්ස් - එස්.එස්.සී ගැටුම ලබන ඉරිදා..

ප්‍රීමියර් ලීග් තරඟාවලියේ "ඒ" කොටසේ අවසන් මහා තරඟයට පිවිසීමට කෝල්ට්ස් ක්‍රීඩා සමාජය අද සමත්වූවා. හලාවත මේරියන්ස් සමඟ පැවති අවසන් පූර්ව තරඟයෙන් කඩුලු 4ක ජයක් වාර්තාකරමින් කෝල්ට්ස් කණ්ඩායම මෙම සමත්කම දැක්වීය.
      කාසියේ වාසිය දිනා ප්‍රථමයෙන් පන්දුවට පහරදීමට කෝල්ට්ස් නායක මහේල උඩවත්ත තීරණය කලේය.
ලකුණු සටහන මෙසේයි.
මේරියන්ස් 147/10 (පන්දුවාර 47.3 )
උඩවත්ත 40, ජානක 35* | පෙරේරා 10/2 , වාස් 14/2

කෝල්ට්ස් 151/6 (පන්දුවාර 44කදී)
වර්ණපුර 56*,පෙරේරා 35* || ගයාන් විජේකෝන් 18/3
තරඟයේ වීරයා - කෝල්ට්ස් නායක මලින්ද වර්ණපුර

  ඒ අනුව එළඹෙන 9 වෙනි ඉරිදා කොළඹ එස්.එස්.සී. ක්‍රීඩා සමාජය සමගින් අවසන් මහා තරඟයේදී කෝල්ට්ස් පිළ තරඟ වැදීමට නියමිතයි. එය දිවා රාත්‍රී තරඟයක් ලෙසින් ආර්.ප්‍රේමදාස පිටියේදී සවස 2.30ට ආරම්භ වීමට නියමිතයි.

ලෝක කුසලාන සංචිතය කරලියට | සනා-වාස්-රන්දි ඉවතට

1. කුමාර් සංගක්කර ( නායක )
2. මහේල ජයවර්ධන ( උප නායකා
3. උපුල් තරංග
4. තිලකරත්න ඩිල්ෂාන්
5. තිලාන් සමරවීර
6. චාමර සිල්වා
7. චාමර කපුගෙදර

8. ඇන්ජෙලො මැතිව්ස්
9. තිසර පෙරේරා

10. නුවන් කුලසේකර
11. ලසිත් මාලිංග
12. දිල්හාර ප්‍රනාන්දු
13. මුත්තයියා මුරලිදරන්
14. අජන්ත මෙන්ඩිස්
15. රංගන හේරත්


තේරීම් කමිටු සභාපති අරවින්ද ද සිල්වා මහතාගේ ප්‍රධානත්වයෙන් අද පැවති මාධ්‍ය හමුවකදී මෙම සංචිතය එළි දක්වන ලදී..
ලෝක කුසලාන බලාපොරොත්තුවෙන් පසු වූ සනත් ජයසූරිය සහ චමින්ද වාස් මෙන්ම මෑත කාලීනව දස්කම් දැක්වූ නවක ක්‍රීඩක සුරාජ් රන්දිව් ද සංචිතයෙන් ඉවත් කර ඇති අතර වමත් දඟ පන්දු යවන රංගන හේරත් කැඳවා ඇත.

කෙසේ වෙතත් දැන් සංචිතය නම්කර හමාරය. ලෝක කුසලානයට ඇත්තේ තව දින 42ක් වැනි ඉතා කෙටි කාලයකි.. සියලු ශ්‍රී ලාංකිකයන්ගේ බලාපොරොත්තු ඉටුවන ලෝක කුසලානය හඹා යන මෙම කණ්ඩායමට අපගේ උණුසුම් සුභපැතුම් එක්කරමු..!!
සිංහයන්ට ජය...!!!!

සිංහාවලෝකනය - 2011

ආවා ආවා ඕන්න ආවා....!!!
සිංහාවලෝකනේ මෙන්න ගෙනාවා....!!!!

"හිප් හිප් හුරේ.." තේමා ගීතය.


සිංහාවලෝකනය - පූර්ව දර්ශනය නරඹන්න...

සිංහාවලෝකනය ජනවාරි 14 සිට දිවයින පුරා ඊ.ඒ.පී සිනමාහල් වල තිරගත වෙයි....!

අතිරේක එක්‌දින ක්‍රිකට්‌ තරගාවලිය ශ්‍රී ලංකා ක්‍රීඩකයෝ ප්‍රතික්‍ෂේප කරති

ලෝක කුසලාන ක්‍රිකට්‌ තරගාවලියට පෙර ශ්‍රී ලංකා කණ්‌ඩායමට අතිරේක එක්‌දින තරගාවලියක්‌ ලබා ගැනීම සම්බන්ධව කටයුතු කිරීමට යෝජිත වුවද ඒ සඳහා ශ්‍රී ලංකා ක්‍රිකට්‌ කණ්‌ඩායමේ ක්‍රීඩකයන් අකමැත්ත ප්‍රකාශ කර ඇත.

මේ දිනවල පැවැත්වෙන අන්තර් ක්‍රීඩා සමාජ පළමු පෙළ ක්‍රිකට්‌ තරගාවලිය සහ එළැඹෙන අන්තර් පළාත් තරගාවලිය හේතුවෙන් ශ්‍රී ලංකා ක්‍රීඩකයන් යෝජිත වූ අතිරේක එක්‌දින තරගාවලිය අනවශ්‍ය බව ශ්‍රී ලංකා ක්‍රිකට්‌ ආයතනයට දැන්වූ බව එහි ලේකම් නිශාන්ත රණතුංග පැවසීය.



වැඩිදුර කියවන්න
උපුටා ගැනීම - දිවයින